روس کے مسافر طیارے میں آگ لگنے سے 41 افراد ہلاک

روس کے مسافر طیارے میں آگ لگنے سے 41 افراد ہلاک

ماسکو(نیوزلیب)روسی دارالحکومت ماسکو میں ہوائی اڈے پر مسافر طیارے کی ہنگامی لینڈنگ کے دوران آتشزدگی کے نتیجے میں 41 افراد ہلاک ہوگئے۔

تفصیلات کے مطابق ماسکو کے شیر میٹیوووا ایئرپورٹ پر طیارے کی ہنگامی لینڈنگ کے دوران آگ لگنے سے 41 افراد جان کی بازی ہار گئے۔

مقامی میڈیا کے مطابق آتشزدگی کے واقعے میں مرنے والوں میں دو بچے اور فلائٹ اٹینڈینٹ سمیت 41 افراد شامل ہیں۔ متاثرہ طیارہ روس کے شہر ماسکو سے مرمانسک جا رہا تھا
کہ طیارے کے پچھلے حصے میں آگ لگی اور دیکھتے ہی دیکھتے آگ نے پورے جہاز کو اپنی لپیٹ میں لے لیا۔

طیارے میں سوار مسافروں نے آئرفلوٹ نامی جہاز سے نکلنے کے لیے ہنگامی راستے سے نکلنے والی سلائیڈز کا استعمال کیا۔

روسی حکام کے مطابق طیارے کے پائلٹ نے ٹیک آف کے فوری بعد واپس لینڈنگ کی اجازت مانگی تھی ابھی تک یہ واضح نہیں ہے کہ طیارے میں آگ کیسے لگی اور اسے ہنگامی لینڈنگ کیوں کرنا پڑی۔

یاد رہے کہ 2016 میں دبئی سے روس جانے والا مسافر طیارہ لینڈنگ کے دوران گرکر تباہ ہوگیا تھا جس کے نتیجے میں عملے کے 6 ارکان سمیت 61 افراد ہلاک ہوگئے تھے۔

مسافر طیارہ بوئنگ 737 روس کے جنوبی شہر روستو آن ڈان کے ایئرپورٹ پر لینڈنگ کے دوران گرکر تباہ ہوا تھا۔