سندھ ہائیکورٹ: مفتاح اسماعیل کی حفاظتی ضمانت منظور

سندھ ہائیکورٹ: مفتاح اسماعیل کی حفاظتی ضمانت منظور

کراچی(نیوزلیب) سندھ ہائیکورٹ نے مفتاح اسماعیل اور عمران الحق کی 7 روز کے لئے حفاظتی ضمانت منظور کرلی۔ عدالت نے 5 لاکھ کے مچلکے جمع کرانے کا حکم دے دیا۔

لیگی رہنما مفتاح اسماعیل نے حفاظتی ضمانت کیلئے دائر درخواست میں موقف اخیتار کیا کہ نیب تحقیقات کا سامنا کرنے کو تیار ہوں، نیب کارروائی بدنیتی پر مبنی ہے، گرفتاری کا خدشہ ہے، حفاظتی ضمانت دی جائے۔ گزشتہ روز نیب حکام نے مفتاح اسماعیل کے گھر پر چھاپہ مارا تھا، مگر گرفتاری نہیں ہوسکی تھی۔

مفتاح اسماعیل نے سندھ ہائی کورٹ میں میڈیا سے گفتگو کرتے ہوئے کہا شاہد خاقان جیسا مخلص انسان اس ملک کو پھر کبھی نہیں ملے گا، وہ شریف اور ایماندار شخص ہے، میرے گھر پر چھاپوں کی ضرورت نہیں تھی، مجھے جب بھی بلایا گیا میں نیب میں پیش ہوا، اب عدالت آیا ہوں، عدالت میں اپنی درخواست رکھوں گا، جو عدالت کا فیصلہ ہوگا میں تسلیم کروں گا۔